八方人物--周澄：我做舞小姐的日子... 2010年07月01日
[轉載/蘋果日報] 天崩地裂之後，不知怎的聊到了書，她說愛讀黃碧雲，對葉細細印象最是深刻，葉細細有很多，她口中的是《嘔吐》入面那個。
周澄最近常常在 facebook說想吐。
讀完昨天的《壹週刊》，人們慨嘆，不是慨嘆花落，而是不滿童話主角不連戲。
2007 年暑假，她 20歲，以藝名「阿澄」在新花都夜總會做舞小姐，「講清楚啲即係做『金魚』，陪飲酒，唱 K呀咁，毛手毛腳、攬身攬勢一定有，不過就冇賣淫。」
每天 3時至晚上 11時，她穿着普通「去街衫」返夜總會，但跟家人說在 cafe做暑期工。
「唔會話自己好儍」
遇到感情創傷想不開，一是燒炭、二是跳樓、三是割脈，周澄做舞小姐。「自己做錯事，傷害咗人，覺得自己好衰，百詞莫辯，但係又覺得對方對自己唔公平，於是鑽牛角尖，處理唔到，要同全世界作對，你話我衰，我挑戰自己底線囉，可能因為我反叛。」她說，在夜總會工作，是她這一世人暫時做過「最爆」的事。
「嗰度乜嘢人都有 o架喎，中年男人放工嚟又有，嚟到慣晒隔日就嚟，當嗰度係麻甩佬聚腳地嘅都有。係好傷身 o架，飲酒飲到胃痛、記憶力差、冇胃口，有啲女仔好慘，飲到胃出血入院，之後好返又返嚟再做。」
「麻醉自己，喺個完全唔同嘅世界入面，扮演唔同嘅角色，慢慢就開始醒。」伴隨着醒覺，還有破滅，「嗰時仲天真，原來呢個世界好多寂寞嘅男人，原來個個男人都咁鹹濕，個個都滾。」
念文化研究的她，回顧整整三個月的經歷，彷彿是一份 project、一次生活體驗，「喺嗰度好體會到階級，聽到好多不幸嘅事，好多俾人忽視嘅聲音，好多人冇得揀、走唔到，而我有得揀，有個客都語重心長同我講，話『呢度唔係你嘅地方』，本來我諗住開咗學都繼續做，但後尾又覺得要開始新生活。既然我幫唔到佢哋，我走得到，都希望可以幫到個社會。」
評價當年的自己，她說：「唔會話係錯事，係唔理智之下嘅決定，唔會話自己好儍、好天真。」
「以前覺得係恥辱，唔敢講畀人聽，覺得啲人會用唔一樣嘅眼光睇我，人哋（同學）好 innocent，自己又做過呢啲嘢。」直到最近，她走上社運舞台，知道有周刊跟蹤她，她才重新思考這件事。
「從來唔係 sell純情」
「我唔想俾人抹黑，如果驚人爆，我唔講，咪即係輸畀佢、驚咗佢？我唔想成世驚，與其日日諗幾時會爆，不如我爆啦。我唔會認輸，如果冇呢啲事，就唔係今日嘅我，家講咗出嚟覺得如釋重負。」
會否擔心別人用有色眼光來看她？「咁 hard feeling一定有，我唔能夠 please晒所有人，總之我無愧於心。攻擊我，我承受到，因為我都要為我做過嘅嘢負責，但係騷擾我屋企人、身邊嘅人，我就接受唔到。」
「每個人都會對你有期望，期望你係 A或者 B，我覺得每個人都要忠於自己，我從來就唔係 sell純情，不嬲都係好『火氣』，『爆粗』嗰類，我唔會扮。」
數數手指，她說大約拍過 10次拖，自知命犯桃花，「中學時代冇人話我靚 o架喎，可能我個人比較直率、熱情。」而那段夜總會經歷，她身邊的男朋友都知道。
她的故事，隨時是「道德塔利班」的攻擊對象或者需要「成人陪同收看」類別，她覺得是「肥皂劇綜合症」作祟，「啲人睇得 TVB太多，個社會好偽善，好多鬧我嘅人，自己好高尚，其實自己做得，人哋又唔做得。我覺得個社會應該放下道德潔癖，唔好咁多幻想，不自覺咁忽視現實，現實就係咁，只係啲人唔願意面對。」
有社運中人說她藉男人上位，她這樣回應，「我知道自己有啲優勢，例如如果我冇呢個樣，就唔會係今日咁，不過我都受過好多傷，紅咗之後多咗抹黑。啲人話我踩住男人上位，話我一步一步上位，其實我上咗乜嘢位呢？呢幾年我都做咗好多嘢，讀政策分析、理論，我都好努力。」
「我底線真係好低」
現時「冇拖拍」的她，雖然追求者一大堆，卻對愛情沒有憧憬，過度早熟的她，覺得男友或丈夫「去滾」是無可厚非，「如果佢係去玩吓，返嚟仲係錫屋企人，盡老公嘅責任，盡爸爸嘅責任，係咪要咁批判呢？」記者提她，女人的底線只可以收藏，不可以言明，否則所謂底線可以退完再退，「可能我底線真係好低，我會明白男人點解係咁。」
「我以前搵男朋友，都係想搵個認同，家就隨緣，都係想搵一個伴侶，大家獨立，互相信任，會追求理想，可以扶持對方。」
「過咗去嘅事就過咗去，我家只想為自己嘅前途打拼，以前嘅事唔會束縛住我，我擔心前途多啲，啱啱畢業，想打拼一下，衝出香港，做幾年嘢，攞多啲社會經驗，做外國 NGO，再返嚟讀書，我都係唔想從政，可能幾年之後都冇人識我啦。」
訪問途中，家人來電，周澄才道出事情真相，記者問她為甚麼不早點跟家人交代，她說，「我唔知點講呀！」
攝影師隔着鏡頭，不停說無論怎樣拍，周澄也是可愛的小女孩，她自己心裏知道，自己雖受樣子所限，卻不甘心做兒童節目內的譚玉瑛，她要拼的，是黃碧雲筆下的《烈女圖》。
記者 張嘉雯
